O Roteiro dos Miradoiros é un itinerario de 25 km de longo que sae de Cariño e acaba en Cedeira, ou viceversa. Percorre toda a Serra da Capelada, visitando a maioría dos seus miradoiros, entre eles, o Faro de Cabo Ortegal, o miradoiro do Limo, o miradoiro da Miranda, o miradoiro de Vixía de Herbeira, o miradoiro do Cruceiro… entre outros, así como a aldea de Sto. André de Teixido, onde se sitúa o famoso Santuario ao que “vai de morto ou que non foi de vivo”, fin do Camiño dos Romeiros e lugar moi coñecido en Galicia. 

Acceso: En coche, autobús ou autocaravana, desde Cariño, dirección Cabo Ortegal, despois de volver do faro, desvío á dereita sinalizado como “Miradoiros da Capelada”. A continuación segue as indicacións “Vixía de Herbeira / Sto. André de Teixido” pola estrada DP2205 , despois dirección Cedeira. Ao miradoiro da Miranda non hai acceso en autobús ou autocaravana.

Recomendacións: Procura realizar o roteiro en días despexados e sen néboa, aproveitarás mellor a visita. É recomendable levar roupa de abrigo para visitar as zonas altas.