Roteiro lineal de dificultade media-alta, de 3 horas de duración (só ida) que atravesa a Serra da Capelada desde o miradoiro da Malveira (acceso a Cabo Ortegal) e finalizando ou ben no miradoiro de Vixía de Herbeira ou ben no miradoiro da Miranda. Atravesa o Monte Faroleiro (334 m.) e pasa por detrás da aldea da Vacariza. Ao final do camiño de terra hai que virar cara á dereita coa ría a man esquerda e pasaremos polos miradoiros do Limo (380m) e de Lodeiro (390m), con vistas cara á Ría de Cariño-Ortigueira. A continuación atoparemos á dereita a zona da Fornela con vistas do Océno Atlántico e dos impresionantes Cantís de O Cadro, os máis escarpados da zona. Ao final chegaremos a un desvío para subir, ou ben á cima do Monte da Miranda (493m) con fantásticas vistas panorámicas da Ría ou ben ao miradoiro de Vixía de Herbeira (613m) con vistas da zona de cantil máis elevada. Existe a posibilidade de continuar desde Vixía de Herbeira ata Sto. André de Teixido. Entronca co roteiro Faro Cabo Ortegal a Punta do Limo á altura do miradoiro da Malveira (acceso a Cabo Ortegal).